انا اتلهيت وخدل زندي
مانيش نبي الله غاندي
ان كانت الغلطات من دي
يكون ف عون اللي عملها
***
ان كان علي الملح اكلنا
وان كان علي السجن دخلنا
والصوم نحلناه ونحلنا
خلي اللي فاضل لرجالها
***
ياما انطحن شاعر قبلي
واللوح كتب له اللي كتب لي
واشمعني شعرك يا غرابلي
خلاك تفوت من غربالها
***
انا اللي صليت ف جهادي
وغشني سحر الوادي
وهبت للنيل اولادي
من بعد ما عمرو دخلها
***
يا ام الكرنك والدلتا
حاتعملي طرشه لإمتي؟
ما اتغيرت كلمه زفتي
والدنيا راقت احوالها
***
قالوا اللي يشرب من نيلك
لابد يرجع ويجيلك
وانا اللي عطشان ف سبيلك
الدنيا ايه اللي جرالها؟
***
باريس خلاص صبحت خربة
اللقمة فيها بمضاربة
ونا اترميت وسط مغاربة
الغلب والكرب قتلها
***
مغاربة يا الزر ماشوكة
بزر تربط به فلوكة
باكل معاهم شكشوكة
تشمط وتشوي اللي يأكلها
***
لا سطل خروب يسعفني
ولا ابن نكتة يكيفني
ما يقصف العمر ويفني
غير الخلايق بعبلها
***
يا مصر هجرك يكفاني
يا عاملة قمع وناسياني
ده انا يوم ما حرجع لك تاني
حاتبقي رجعة برسمالها
