مبدأيا انا فعلا مش عايزة نصيحة أنا محتاجة حل من ناس متحضرة وفاهمة.
انا دلوقتي عندي 49 سنة عانس ومش حلوة خالص وجسمي ضخم وأنا عارفة كده وراضية ينصيبي، عمر ما حد اتقدّملي لا خطوبة، ولا جواز، ولا حتى حد دخل البيت من بابه.
كل اخواتي البنات والولاد اتجوزوا وأنا عايشة دلوقتي في بيت بابا وماما الله يرحمهم وعايشة لوحدي، تعليم عالي وبشتغل وبصرف على نفسي، ومحدش ليه جميل عليّا غير ربنا.
شغلي أونلاين عرفني على سكك مش كويسة خصوصا وإن صوتي حلو وبعرف امثل بصوتي كويس.
رغم إن الناس بتحترمي وفاكرين إني قوية ومستقلة، بس من ساعة ما ماتت أمي من تقريبا 20 سنة وانا عايشة في وحدة صعبة.
وأصعب حاجة إنك تحس إنك مش مرغوب، مش متشاف، شفاف وأنا مش هكدب بس انا من سنين وانا بعوّض النقص والحرمان اللي جوايا بصوتي.
عندي اكونتات كتير وبتكلم مع ناس على النت وطبعا بكذب وبعمل علاقات واقول كلام، هزار، وكل حاجة ممكن تتصورها بصوتي مع الرجالة.
وأنا عارفة كويس قوي إن اللي بعمله حرام وعارفة إن ده مش حل، وإنه بيزوّد الوجع مش بيقلله.
بس انا بضعف ومعنديش أي سكة غير دي مفيش حد بيقولّي “وحشتيني” ولا حد يسأل عليّا بجد.
ولا حد محتاجني غير لما أكون صوت حد تاني بيتكلم بغريزة وشهوة.
كل مرة أقول هبطل وأرجع أضعف.
وأقعد أعيط وأستغفر وأحس إني وحشة، وإن ربنا مش راضي عني.
أنا مش عايزة أعيش كده ومش عايزة أكون ست كبيرة ومذنبة بالشكل ده.
حاولت اشغل نفسي اكتر واحفظ قرأن وادي دروس لأطفال بس انا جعانة للإهتمام والحب والاحساس اني ست متشافة ومسموعة ومش قادرة ابطل ومش عارفة أعمل إيه.
ياريت اللي عنده نصيحة من غير قسوة يقول.
التعليقات