كيف استطيع بيع تصميم موقع كقالب للووردبريس

لا أعرف إذا كان سوف يفيدك أو لا أو هذا هو قصدك أو لا

ولكن قد يفيدك بعض الشيء في بيع القوالب أو التصاميم بشكل عام على الإنترنت

منقول من جروب برايفت لذلك لن يظهر شيء إذا قمت بوضع الرابط

سوق Envato وتحديدا Themeforest

كتير مننا السوق دة بالنسبة ليهم اسطورة والوصول ليه صعب جدا من وجهة نظرهم رغم ان الموضوع أبسط من كلمة بسيط وتعالوا مع بعض نشوف المشاكل اللي بتواجه الناس وحلها ايه بالتفصيل وازاي ان شاء الله تخليهم يقبلوا أي Item ليك بس قبل المشاكل والنصايح إقرأ الجملة دي.

================================

هل تعلم أن الناس اللي بتراجع وراك تصميمك انت كمصمم ويب محترف أحسن منهم بكتير وعندك خبرة أكتر منهم ؟ مش مصدق صح ماشي هثبتلك في البوست :)

================================

بعض العوامل الموجودة في السوق ومعلومات عنها:

الجودة

كتير جدا ثيمات ومواد معروضة في السوق تصميماتها وحشة ومش ماشية على المعايير وطريقة كتابة الكود سيئة جدا واغلب المواد دي بيكون حاطينها هنود فاتحين شركات بيبيعوا بس في السوق دة وناس كتير هتأكد كلامي من اللي شافوا بعنيهم.

التسويق

أغلب الثيمات اللي محققة مبيعات رهيبة بيكون نسبة كبيرة جدا من المبيعات دي بسبب التسويق والانتشار الرهيب وفي ثيمات تانية غلبانين جدا وتصميمهم أجمل بكتير من الثيمات اللي بتحقق مبيعات رهيبة دي يبقى كدة الموضوع راجع للتسويق كمان.

السعر

في ناس كتير بتشتري مواد من السوق علشان سعرها رخيص وممكن تكون المواد دي مش بنفس جمال التصميمات التانية ابدا لكن بيكون السعر بالنسبة ليه أهم من الجمال ودي شوفتها من عملاء كتير بتفرق جدا معاه ال 60 دولار عن ال 40 دولار لذلك السعر ليه دور كبير جدا في الموضوع.

وفي عوامل كتير جدا مش هتفرق معانا الكلام عنها لاننا هنجيب الخلاصة.

================================

ازاي معرفش احط تصميماتي على Themeforest

================================

عوامل كتير بتخليك تفشل وان الثيم بتاعك ميتقبلش وهناخد على سبيل المثال واحد عاوز يعمل مثلا جدول Pricing Plans الخاص بخطط الاستضافة للشركات وعاوز ينزله على السوق ودة جدول بسيط مش تصميم موقع كامل وممكن سعره يكون مثلا 10 دولار ومش هيكون فيه تعب كبير منك زي التصاميم الكاملة وتصاميم الوردبريس مثلا.

-=-=-=-=-=-=-=-=-=-=-=-=-=-=-=-=-=-=-=-=-

الاستعجال

كل واحد فينا شاف تصاميم قديمة من Pricing Plans وقال يلا وهوبا بدأ وعاوز في خلال يوم او اتنين ينزل التصميم بتاعه مبروك انت فشلت بجدارة :D يا أخي وحبيبي خد وقتك تماما مفيش اي حد بيجري وراك ولا في Deadline انت ماشي عليه علشان تستعجل افتح السوق وشوف ال Pricing Plans كلها الموجودة وادرسها كويس وشوف مين محقق أكتر مبيعات وشوف مميزات كل واحدة فيهم وفكر ازاي تقدم ميزة جديدة ؟ او شكل مفيش حد قدمه او خيارات زيادة وناخد أمثلة.

1- واحد حاطط ال Pricing Plans وعاملها بالبوتستراب طيب انا واحد فاهم يعني ايه بوتستراب وفاهم ماتيريال ديزاين كمان طيب ليه معملش فكرة مجنونة واعمل نفس ال Pricing Plans دي نسخة بوتستراب ونسخة تاني ماتيريال ديزاين وازود فرصة المبيعات؟

2- واحد حاطط الجدول 3 أعمدة بس طيب ليه انا معملش 3 أعمدة وكمان أربع اعمدة واظبط الشكل في جميع الحالات.

3- واحد حاطط الجدول باربع الوان بس طيب ليه انا مديش للشخص فرصة عن طريق ال Sass انه ياخد Unlimited Color ويختار اللون بنفسه واكون مرشحله انا اربع او خمس الوان عجبوني ؟

4- واحد عامل ديمو او اتنين ببيانات وهمية ليه انا معملش بيانات حقيقية لشركة استضافة علشان الشخص يتخيل الشكل فعلا بشكل صحيح وكمان بدل معمل ديمو او اتنين اعمل 4 ديمو او خمسة او عشرة بكل لون مرة.

5- واحد عامل في الجدول خمس عناصر بس مثلا عنوان وسعر ومميزات ليه مضيفش انا عليه مميزات تانية واسمح للشخص انه يشيل منها واكون زودت فرصة المبيعات ؟

بعد معرفت ممكن تعمل ايه خد وقتك وبراحتك خالص وابدا صمم وبدع وخد رأي الناس ومتسيبش Pixel واحد الا لما تهتم بيه وصلح كل شيء مهما كان بسيط وتافه علشان لما تديلهم الثيم يقبلوه مباشرة بدون تفكير.

-=-=-=-=-=-=-=-=-=-=-=-=-=-=-=-=-=-=-=-=-

الاهتمام بالكود

كل واحد بدأ تصميمه وهوبا نسي الكومنت ونسي التنسيق ونسي ان في ناس هشتغل وراه وبرضة نقوله الف مبروك على الفشل :) لازم ثم لازم ثم لازم تهتم بتنسيق الكود وكتابة التعليقات لانك مش بتشتغل لوحدك في ناس وراك هتشوف الكود اما تفتح نفسهم ويقولوا الشخص دة فاهم بيعمل ايه او يقول ايه القرف دة والخيار ليك انت لوحدك ودة مرتبط بالنقطة السابقة لان الشخص هيكون عارف لو عاوز يشيل جزء من الثيم يشيل من اول فين لفين وبخبرتك وابداعك في المجال ممكن تحول العميل اللي مبيفهمش حاجة لمصمم يعدل على الثيم بتاعك من كتر سهولته :) رجاء ثم رجاء اهتم بالكود لانه الواجهة اللي هيشوفها العميل بعد ميشوف الشكل الخارجي.

-=-=-=-=-=-=-=-=-=-=-=-=-=-=-=-=-=-=-=-=-

خدمات ما بعد البيع والثقة

لازم العميل يثق فيك ويعرف ان ال Business بتاعك مستمر يعني متروحش ترفع الديمو بتاعك على موقع مجاني هو نفسه كعميل هيقول دة معندوش موقع بيعرض فيه خدماته يعني هو عارف انه مش مكمل طيب وليه ؟؟ انت ممكن ب 15 دولار تفتح موقع كامل ليك في السنة يعني بتمن Item واحدة لو اتباعت لازم تخلي العميل يثق فيك وفي انه هيلاقي الشخص بعد ميشتري وعارف انه مستمر في مجاله الى ما شاء الله.

-=-=-=-=-=-=-=-=-=-=-=-=-=-=-=-=-=-=-=-=-

الدعم والتطوير

كتير ناس شوفتها عملوا ثيم وبعد مخلصوه مع السلامة مفيش تطوير ومستحيل ميكونش في تطوير في الدنيا ومستحيل لو انت سوبر مان الثيم بتاعك ميكونش فيه مجال لتطويره لازم تتطور واكبر مثال على كلامي Avada ثيم واحد بس عنده مهتم بيه بقية حياته مش بيعمل ثيمات تانية بيطور فيه والنتيجة ملايين الدولارات لذلك اهتم بتطوير المواد المعروضة عندك متخلصش ال Item وتقول قفلنا الباب دة روح شوف الشركات العالمية لما بتوقف دعم حاجة معينة بيكون ايه السبب ؟ خد عندك انترنت اكسبلورر لما مايكروسوفت وقفوا دعموا ليه ؟؟ علشان العالم كله اتأذى منه لكن مكملين تطوير بقية برمجياتهم ليه ؟ علشان الناس بتستفيد منها اختار انت بقى المناسب ليك توقف دعم المواد بتاعتك ولا تكمل دعمها ؟

كل يوم طور في الثيم بتاعك وضيف عليه مميزات جديدة هتفيد الناس اللي اشتروا منك قبل كدة وهيحبوا ال Portfolio الخاص بيك وهيتابعوه دايما وكمان هتفيد الجدد اللي شايفين ان الشخص بيطور دايما في المواد بتاعته يعني في امل انه تصاميمه تتحسن اكتر كل يوم يعني باختصار هتدي الثقة لكل الناس القديم والجديد ومبيعاتك هتزيد.

-=-=-=-=-=-=-=-=-=-=-=-=-=-=-=-=-=-=-=-=-

عرض المنتج

السوق بيقدم للشخص ال Live Preview الخاص بالثيم بتاعك طيب ليه انت متطلعش احسن من السوق وتعمل قناة خاصة بالموقع بتاعك وتعرض فيها شغلك على هيئة فيديو وصور و عرض حي كامل للتصميم كمان علشان تخلي الشخص ملوش حجة هتقولي ايه لازمة الفيديو مهو عنده Live Preview يشوف منه كل حاجة هقولك الشخص يشوف غير لما المصمم نفسه يشوف في حاجات مش هيشوفها العميل وانت تعبت فيها ممكن انت بقى فرصتك في الفيديو توريهاله وتقولوا هنا ممكن تعمل كذا وكذا وكذا وبكدة يبقى مفيش حاجة في تصميمك مظهرتش خالص.

-=-=-=-=-=-=-=-=-=-=-=-=-=-=-=-=-=-=-=-=-

اقدر اقولك انك لو عملت كل الحاجات دي هتحط رجل على رجل بعد متبعت الثيم بتاعك وتستنى الموافقة وانت مبسوط ومطمئن ومش محتاج تقعد على اعصابك ولا تخاف انهم يرفضوا الثيم لانك ببساطة محترف أكتر من اللي بيعملوا Review للثيم بتاعك وعملت حاجات هما نفسهم بيفوتوها ومش بيهتموا بيها ومش ناقص غير انك تسمع مبروك وعقبال المبيعات