لما بنسمع حكاوى جدودنا والجيل اللى قبلنا بيقولوا قد ايه كان المجتمع راقى ونضيف ... فيه احترام واخلاق بين الناس ..

الصغير لازم يحترم الكبير والكبير لازم يقدر الصغير .

بنخرج من القعده دى وخيالنا سارح بينا بعيد فى دنيا تانيه بس اول ما نفتح الباب ع دنيتنا دى بنتصدم بالواقع وبنشوف ان كل الكلام دا فعلا مجرد حكاوى !! مبقتش موجودة اللى موجود قلة ذوق مفيش مراعاة لحرمة اى حاجه مش بس بقى فيه قلة ذوق ده بقى فيه قلة ادب ومفيش حياء... قلدنا الغرب تقليد اعمى وانفتحنا ع المجتمعات الغربية بشكل يخوف لدرجة اننا نسينا عاداتنا وتقاليدنا وتربيتنا احنا ... بنلبس ع الموضه ومش شايفين اننا بكدا بنبوظ الذوق العام .

بقى فيه برود فى المشاعر محدش بيحس بحد كل واحد فى دنيته وعيشته ومش باصص للى حواليه فاكرين اننا كدا هنعيش احسن بالعكس داحنا بنموت بالبطئ وبنبعد عن بعض لحد ما بقى بيننا مسافات عايزة سنين عشان نقرب تانى.

بقينا نلاقى ف اى وسيلة مواصلات شاب صغير قاعد رجل ع رجل وراجل قد جده واقف لحد ما ضهره اتقطم ورجله ورمت ومش هاين عليه يقوم عشان يقعده !! مبقاش فيه حد بيساعد حد حتى الكلمة الحلوة بنستخسرها ف بعض.

المعافرة والارادة بتاعت زمان لما كانوا بيذاكروا ع لمبة جاز دي مبقتش موجودة بالعكس دا بقى المتاح لينا اكتر بس بردو بنكسل ونستسلم.. وحياة قلبى وافراحه دى بقينا نشغلها بعد ما نجحنا بمجهود غيرنا او مبقناش نشغلها اصلا .

بقى اللى بيصلى ويقطع دا المتدين مبقاش حد عارف حاجه عن دينه وهما آيتين اللى حافظهم وماشي يتنطط بيهم على الناس وياريت فاهمهم صح... حتى الحب مبقاش زى زمان مبقناش نسمع عن قصص الحب الاسطورية بتاعت جدى وجدتى انهم تعبوا وكملوا مع بعض فوق ال50 سنه ... بتوع اليومين دول نفسهم قصير ومن اول سنه ومع اول مشكله بينطوا من المركب .

لما نبص ع مساوئ المجتمع دلوقتىفى 2020 نلاقى ان العيب مش ف الدنيا العيب فينا احنا لان الحياه زى مهيا الظروف صعبة.. ما كانت زمان اصعب بس كان فى ناس قوية بتتعب عشان توصل احنا اللي بنستسهل بنستسهل نتعب وهنفضل نستسهل لحد ما نغرق.

لازم_نفوق