عزيزى.. عزيزتى مرة أخرى مع جزء ثانِ من "انتقاء عشوائي من الذاكرة لأفضل الأفلام التى أرغب فى تكرار مشاهدتها دون ملل على الإطلاق" .. لكلا منا قائمته الخاصة لتفضيلاته من الأفلام السينمائية ، ولكن أي منها ترغب أن تشاهده مرات ومرات بنفس حماس المرة الأولى و دون أن يتسلل الملل إليك ، الترتيب فيها لا يعني الأفضلية إنما هو نتيجة للاسترسال العشوائي وليد الذاكرة العشوائية.
Hacksaw Ridge 2016
ازاى تقدم قصة إنسانية وسط أجواء مشاهد حرب عنيفة ببراعة ! بدون أن يطغى جانب منهم على الاخر، تحدى أظن نجح فيه ميل جيبسون -مخرج العمل- ببراعة.
الفيلم مأخوذ عن قصة حقيقية من خلال سيرة ذاتية للجندى ديزموند الذى تطوع كمُسعف في الجيش الأمريكي خلال الحرب العالمية الثانية يرفض حمل السلاح والقتل ، رحلة الفيلم هى حرب إنسان ضد مجتمعه Man Vs Society خصوصا مع بداية مشاهد التحاقه بالجيش.
Pay It Forward 2000
هل يمكن لطفل أن يغير العالم من حوله للأفضل ، مدرس (يجسد شخصيته كيفن سبيسي) بيطلب من تلاميذه مهمة أو واجب كشرط للنجاح فى المادة خلال دراستها .." مطلوب فكرة لتغيير العالم من حولك ثم أبدأ فى تنفيذها " فكرة الفيلم فى حد ذاتها للوهلة الأولى تبدو عادية ، لكن عندما يبدأ أحد التلاميذ "تريفور" بتنفيذ فكرته تصبح فكرة الفيلم ملهمة ، والفكرة بالفعل ألهمت مجموعات تستخدمها ما بعد عرض الفيلم. بل وبينما يطلب المعلم نفسه هذه المهمة كواجب مدرسي لم يكن يتوقع ما حدث فيما بعد من تأثير تخطى حدود المدرسة والأسرة.
أحداث الدراما الموجودة فى الفيلم جذابة برغم بساطتها وبرغم من انها تخلو الا فى بعض أجزاءها من أحداث كبيرة تلفت الانتباه وتعتمد فى معظم أوقاتها على الحوار الكافى لجذب فضول المشاهد.
طير أنت 2009
من أجمل أفلام "الرومانتيك كوميدي" المصرية ، دا إذا اعتبرناه كده، هو مش رومانتيك بالمعنى المعتاد للفيلم الرومانسي لأن المشاهد الخاصة بالبطل ومحبوبته ممزوجة بمواقف بتركز على البطل نفسه اكتر من العلاقة اللى بينهم ، وبتقصد تبرز تفاصيل شخصيته ، كأن فيه خطين مترابطين فى الفيلم بيخدموا المعنى، حبه للبنت فى المواقف الافتراضية اللى بيدخله فيها الجنى "ماجد الكدوانى" والخط التاني هو اكتشافه لنفسه و ل "هو مين بالظبط" ، فيلم خفيف بيقول ببساطة ان الشخصية غير المفتعلة مبهرة لأحدهم بطبيعتها، وازاى شخصياتنا ممكن تكون مهددة بالانقراض والمحو لحساب اللهث وراء الابهار ، ايوه، الفيلم بيتكلم عن أزمة الهوية الشخصية بشكل كوميدي لذيذ وبسيط وبيوصل المعنى.
2009 Avatar
Survival Movie ولكن عن إنقاذ الطبيعة وليس البشر فقط، لأنه ما وراء مشاهد الفيلم يُفهم ضمنيا أن مصير البشر مرتبط بالطبيعة، الفيلم بيحكي ازاى حياة شعب بالكامل -"شعب النافي" وهم نوع آخر من البشر لهم شكل مختلف عن إنسان الأرض، ولكن لم تتلوث فطرتهم بعد، معرضة للخطر بسبب طمع وشر الانسان ، تجسيد للصراع بين عالمين مختلفين عالم كوكب باندورا المتداخل مع الطبيعة وعلاقته بها وبما تحويه من حيوانات وأرض وجبال ....، وعالم البشر فى الأرض بكل ما فيه من دمار، تجسيد لمعاناة الطبيعة من أفعال البشر التى تدمرها، و طرح تساؤل من نوع "هل الطبيعة يمكن ان تغضب وتعبر عن غضبها لما يُفعل بها؟"
جيمس كاميرون – مخرج العمل قال "أردت أن أقدم شيئًا يحتوي على مزيج من الإثارة والمغامرة. ولكنه في نفس الوقت يخاطب ضمير المشاهد، ربما أثناء الاستمتاع به يجعلك تفكر قليلًا في الطريقة التي تتفاعل بها مع الطبيعة والبشر"
آسف على الإزعاج 2008
رحلة الفيلم عن حرب إنسان مع نفسه Man Vs himself صراع مع النفس ملئ بالكوميديا السوداء، من أجمل أفلام أحمد حلمي على الإطلاق وأفضل أفلام السينما المصرية كمان ، طول الوقت السر فى عظمة الفيلم هو الفكرة اللى قادرة تجذبك لمشاهدة الفيلم مرات ومرات بنفس القدر من المتعة، من أجمل نصوص السينما المصرية كسيناريو وحوار، وأجمل ما كتب أيمن بهجت قمر، وجدير بالملاحظة ان أقوى مشاهد الفيلم بتبدأ بعد ما بنكتشف ان والد حسن اللى بيكلمه طول الفيلم هو شخص ميت وغير موجود فى الحقيقة، التصوير فى الأماكن الخارجي رائع ، والإخراج نجح بتفاصيل دقيقة يشاور على المرض النفسي بدون كلام كتير.
ألف مبروك 2009
تكرار نفس الأحداث مع اختلاف بعض التفاصيل هى تيمة وقالب شهير ، ولكن السؤال هو هتصب فيه ايه ، هتستخدمه ازاى .. البطل فى الفيلم هو شخص يومه بيتعاد بنفس أحداثه، حتى ييكتشف بأنه كان يرى كل أحداث حياته بعدسة مصالحه ورغباته، الفيلم عن العمى اللي بتسببه أنانيتنا، البطل حوّل كل من حوله الى أبطال فى فيلم حياته، لهم وظيفة واحدة فقط هي خدمة رغباته، الفيلم فيه كلام كتير يتقال محتاج صفحات وفى رأيي أنه فى الجزء الأكبر منه يعتبر من أفلام رحلات النضوج Coming of Age Movie اللى واضح فيها بقوة التحول الكبير فى حياة البطل خلال مشهد اكتشافه لحقيقة اوهامه وظنونه عن الناس حواليه ، وازاى التغيير حصل بعدها بمنطقية وبدون مبالغة تدريجبا لدرجة تجعلك تتوحد مع البطل فى الأجزاء الأخيرة من الفيلم تحديدا، والفيلم عمل لون كوميديا متميز مبنى على فهم سياق الأحداث مش الإفيه السهل.
ملحوظة : يحتاج للمشاهدة اكثر من مرة اذا لم تشاهده قبل الآن.
Gladiator 2000
بعيدا عن كمية جوائز الاوسكار اللى حصل عليها الفيلم، فدا من أفلام Masterpiece بلا شك لكونه متفرد من نوعه كفيلم تاريخى حتى رغم استخدام شخصيات غير حقيقية من خيال المؤلف ولكن بأجواء وتفاصيل واقعية من العصر الرومانى، اخراج رائع لريدلى سكوت يتميز بتوضيح التحول فى حياة مكسيموس القائد الجنرال الرومانى الى العبودية ثم العودة مرة اخرى.
Monsters, Inc. 2001
أو بالمصري "شركة المرعبين المحدودة" ما بعد الدبلجة يعني ، من أفضل أعمال بيكسار وديزنى ، شخصياته شلبي سلوفان ومارد وشوشني و بووو غنية عن التعريف طبعا، دايما الأنيميشن قادر يتلامس مع حياتنا بقصصه الخيالية!، وأظن اللهجة المصري فى الفيلم دا، تعتبر نقلة نوعية للفيلم وسبب أساسي فى بقاءه كواحد من أفضل أفلام الانيميشن.
Toy story 1995
تخيل تتعاطف مع لعبة بتخرج من مكانها المعتاد فتضيع فى عالم البشر ، فتخرج الالعاب للبحث عنها، التعاطف مع لعبة دا ازاى؟
دا لأن الفيلم -كعادة أفلام الأنيميشن اللى بتترك أثر - أبعد من كونه قصة عن الألعاب، عايز تتأكد بنفسك، الفيلم موجود للى لم يشاهده للآن والمشاهدة بيننا..
Fight Club 1999
Fight Club فيلم يقدم نقد لاذع للمجتمع الحديث المعاصر وقيوده المتمثلة فى الرأسمالية المتوحشة وإدمان الاستهلاكية الناتج عنها، واغتراب الفرد فى المجتمع الحديث ، أزمة الهوية الإنسانية، الكلام الكبير دا كله بيتقدم خلال مشاهد معبرة عن المضمون ولكن بعد مشاهدة الفيلم اكتر من مرة فى رأيي، الفيلم بيقدم التمرد فى قالب عنيف "نادى القتال" وكأنها السبيل الوحيد لاستعادة القوة والتحكم في الحياة. يتناول موضوعات فلسفية ونفسية عن معنى الحياة الحقيقية، أجمل أفلام ديفيد فينشر بعد فيلم "Se7en"
فيلم لامؤاخذة 2014
هل تعلم ان الفكرة الاساسية لهذا الفيلم " اللوج لاين" تم كتابتها على مدار 6 شهور ، دا مجرد الفكرة فقط، دا اهم الأسباب اللى قالها عمرو سلامة لنجاح الفيلم ، و ابطال الفيلم وقتها كلهم تقريبا غير معروفين باستثناء هانى عادل كمطرب فى باند، عمرو سلامة بيقول الفيلم عني وعن اى حد مش عن المسيحيين بس، الفيلم عن طفل مش عارف ينتمى لمجتمعه.
أربعة فى مهمة رسمية
أحمد زكي يجسد البيروقراطية ببراعة فى جو من الكوميديا السهلة، اخراج بسيط للصورة يخلو من اى فزلكة و دا مناسب جدا لبساطة وواقعية الأماكن التى تم التصوير فيها خصوصا داخل المؤسسات الحكومية.
فى رأيي لا يوجد فيلم تناول البيروقراطية المصرية تحديدا بهذا الابداع . ولا أمّل من مشاهدته أكثر من مرة.
الكيف 1985
= و ازاى يشربوا حاجه مغشوشة ماتسطلش؟
- اللى بيشربوها الدنيا سطلاهم قبل ما يقعدوا يتسطلوا
= اومال عايزين يتسطلوا ليه ؟
-غاويين يبقوا مساطيل زى مانت غاوي الغُـناااا
طبعا دا جزء من حوار فيلم الكيف الشهير بين المزاجنجي "محمود عبد العزيز" والبهظ بيه، والكلام على ازاى المخدرات المغشوشة بالحنة بتسطل الناس!
الكيف مش مجرد فيلم عن المخدرات بمعناها المباشر المعروف انما هى عن الهروب من الواقع عموما بكل ما يحمل، باستخدام انواع مختلفة من المخدرات، أى مخدرات بقى تنفع وسيلة للهروب، واللى واضح فى الفيلم نماذج ليها زي الغُـنا بأي كلام يتعبا ف شرايط ، في مشهد التاكسي لما أخوه (يحيي الفخراني) طلب من سواق التاكسي "يوطّي" الصوت، فرد بجملة حوارية بتلخص الفكرة بكلمات ولغة كوميدية شعبية جدا لكنها معبرة عن الفكرة :
"لازم ندوش الدوشة بدوشة ادوش من دوشتها عشان ماتدوشناش"
إلى جانب البيضة والحجر وأربعة فى مهمة رسمية، يأتى فيلم الكيف على رأس افلام على عبد الخالق المهمة واللى تعاون فيها مع الكاتب محمود أبو زيد اللى فى رأيي أفضل من كتب حوار قادر على جذب المشاهد بمجرد الحوار بدون دراما موقف.
Saving Private Ryan 1998
مش سهل صناعة فيلم حربي بيتكلم عن تأثير الحرب على الافراد فى فيلم واحد، الفيلم بيناقش الفكرة دي خلال تعرض بعض الجنود لصدمات في اطار البحث عن الجندى رايان الابن الأصغر لأم فقدت ابناءها الثلاثة (أخوته) فى الحرب، فجاءت المهمة لإنقاذ رايان وعودته لأمه كتعويض وتعزية لها عن فقد بقية أخوته، الفيلم يثير أسئلة حول قيمة حياة شخص واحد مقابل المخاطرة بأرواح آخرين فى سبيل استعادته.
سبيلبرج مع توم هانكس فى فيلم واحد ، لازم يطلع بالاتقان دا .. الفيلم مش مجرد فيلم حربي ، انما من نوع Hacksaw Ridge كده بيناقش قضية إنسانية فردية جديدة من نوعها ولكن على هامش الحرب.
التعليقات