تجربة محبطة جداً وموقف غريب بمر بيه حالياً مع منصة مستقل @Mostaql وشركة حسوب @Hsoub حبيت أشاركه معاكم هنا عشان لو حد بيمر بنفس المشكلة أو يقدر يفيدني.
يوم 19 يوليو اللي فات، عملت طلب سحب لأرباحي كتحويل بنكي عادي جداً (ودي مش أول مرة أسحب على نفس الحساب وبنفس البيانات). المفروض إن أقصى مدة للتحويل حسب شروط المنصة هي 14 يوم عمل، لكن إحنا عدينا المدة دي ولحد اللحظة الفلوس ما وصلتش.
كلنا عارفين إن وارد يحصل تأخير من البنوك، وعلشان كده طلبت طلب بديهي جداً وبسيط من الدعم الفني: "محتاج رقم تتبع الحوالة او السويفت عشان أقدر أراجع البنك بتاعي وأعرف الفلوس متعلقة فين".
وهنا بدأت المعاناة الحقيقية:
- فريق "مستقل" بيتجاهل التذاكر تماماً ومفيش أي رد أو تحديث.
- لما قررت أصعد الأمر للشركة الأم "حسوب"، كان الرد غريب جداً وببساطة: "روح اتكلم مع مستقل، إحنا مراكز مساعدة منفصلة!" وكأنهم مالهمش علاقة ببعض ومش مسؤولين عن المنصة بتاعتهم.
أنا كشخص بيشتغل في المجال ده وبيعتمد على المنصات دي كوسيط مالي، أقل حقوقي هي "الشفافية". لما تحصل مشكلة في مستحقاتي، المفروض ألاقي دعم حقيقي وإثباتات واضحة، مش مماطلة وتجاهل وتهرب من المسؤولية.
أتمنى لو حد من إدارة @Hsoub أو @mostaqlsupport ، يوضح لنا إزاي بيتم التعامل مع مستحقات الناس بالشكل ده؟ وليه بيتم رفض تقديم أبسط حق للمستقل وهو رقم تتبع حوالته؟
هل حد من الزملاء هنا واجه مشكلة مشابهة معاهم قريب؟ واتصرفتوا إزاي عشان تاخدوا حقكم؟
لا يوجد تعليقات بعد، كن أول من يبدأ النقاش