ما هيا خطوات انشاء شركه برمجه رسميه

اجراءات انشاء شركة برمجيات أو تصميم مواقع انترنت

أولاً : هتروح بعقد إيجار المكتب إلي الشهر العقارى في منطقتك عشان تعمل (إثبات تاريخ) وتكلفته حوالى 15جنية.

ثانياً : هتعمل السجل التجارى والبطاقة الضريبية

مباشــرة لو فى القاهرة الكبرى - هتروح وزارة الصناعة والتجارة اللى فى اول صلاح سالم

ومعاك صورة البطاقة الشخصية + صورة العقد اللى انت عملت عليه إثبات تاريخ - بتطلع اول دور عند قاعة الانشاء بتقول للراجل بتاع الامن

عايز اعمل منشئة فردية بيديك استمارة ورقم تملئ الاستمارة منشئة فردية الحد الأدنى لرأس المال 100 الف جنية (مائة الف جنية مصرى)

وبعد لما يجى رقمك بتدخل للموظف بعملك كل الاجراءات بس مافيش تصميم مواقع ( اسمها برضو برمجيات ) وهو الراجل بيديك ورقة تختار منها اى نشاط انت فى البرمجيات وبعدين بيقولك انزل اعمل ايداع فى البنك با 109 جنية وبعدين بتطلع للموظف تانى بتديلو الوصل بتاع الدفع وبعد كدة بتستنى حوالى ساعة كدة وتستلم السجل التجارى وتمشى وانت هناك بردة تقوم داخل على الضرائب وتقولهم عايز اعمل بطاقة ضريبة بردة بتملئ استمارة كدة وتيجى تستلم البطاقة تانى يوم وانت هناك بردة بتطلع الدور الثانى وتقولهم عايز اعمل مستخرج سجل تجارى ودة بتخدة بعديها باسعتين ياما لو عايز تمشى وتيجى تانى يوم مافيش مشكلة.

المهم انك لازم تقدم عقد ايجار المكتب اللى هتبقى فى الشركة فى خلال سنة من اصدار السجل والا بعد سنة بيسقط السجل اوتوماتيك .

• بعد ما تستلم السجل والبطاقة تروح الغرفة التجارية اللى مقر النشاط تابع ليها تتطلع شهادة مزاولة مهنة (شركة برمجيات).

ثالثاً : تسجيل الدومين الرسمي

وذلك عشان تكسب ثقة العملاء وتثبت للناس انك شركة رسمية من خلال موقعك.

بالنسبة للدومين بتروح تحجزة من فى فرع تي اي داتا ويكون معاك السجل والبطاقة الضريبية ودة التكلفة( 2سنة ب600جنية علطول) بس خد بالك اسم الدومين هيطلع على اسم الشركة اللى فى السجل

مثال لو اسم الشركة (هوست) هيطلع الدومين بالشكل دة (name.com.eg)

فاخد بالك وانت بتأسس الشركة انه يكون على اسم الدومين

رابعاً : تحريات أمن الدولة (استعلام أمنى)

استعين بمحامى بعد فتح المكتب بإذن الله عشان يعملك الاستعلام الأمنى لأن دول ناس مش بتتفاهم (أمن دولة- مصنفات فنية) ممكن يجولك في أي وقت ويقفلوا المكتب لو معملتش الإجراء دة و دة أصعب شئ

وأفضلك تدارى علي مكتبك عشان محدش يجيلك المهم ان معاك سجل تجارى وبطاقة ضريبية عشان تعمل عقود للناس بالبرمجيات أو الشغل ضماناً لحقوقك وحقوقهم.

لكن حذارى من دخول الأمن الي مكتبك (هتخسر كل اجهزتك بالشخص الل قاعد عالجهاز ويتحبس).

خامساً : تحرير عقود للعاملين بالمكتب

أعمل عقود عمل ب250 جنية المرتب مثلا وحوافز تصل إلي (المبلغ الل بياخدو الأصلي) دة عشان الضرائب والاستعلام الأمنى...

سادساً : احتفظ بنسخ من البطايق والعقود للعاملين بالمكتب

سابعاً : يفضل تنزيل نسخ linux للبرمجة علي الاجهزة عشان المصنفات الفنية - أما المصممين بيحتاجوا adobe المجموعة تكلفتها عالية طبعاً.

وبالتوفيق...