سر تعليم (تحدث) اللغة الانكليزية بطلاقة من دون كورسات مدفوعة

عنوان المقال:

كيفية تعلم اللغات بشكل صحيح من دون ضياع للوقت

أنا أحمد، كنت شخص ضايع وأريد أتعلم لغة معينة. واجهتني هواي كورسات وجربت هواي تطبيقات، بس واجهتني مشكلة وحدة بكل مرة، مو نفس الشي اللي أني أطمح له. مو شوية معاني أحفظها، ومو شوية قواعد أتعلمها، أني أريد أحچي اللغة بطلاقة، مو مجرد أحفظ كلمات وقواعد.

حضرت كورسات مدفوعة، وما فاد الموضوع، نفس الشي: تكرار + حفظ معاني، بدون تعبير. تركت الكورسات الأونلاين، وكلت راح أبلش بكورسات معهد، أيضًا نفس الكلام: تكرار + قواعد + معاني، مو تحدث اللغة بطلاقة، وهذا الشي أني ما أريده. حرفيًا كاعد أكرر نفس اللي يعلمونه بالمدرسة، بس أني أريد أحچي هاي اللغة بطلاقة.

وأخيرًا لكيت الحل.

أول موقف حصل معي بالطريق، كنت داخل صالة ألعاب (Games)، والأجهزة كان بيها خيارين: إنكليزي وعربي. فذاك الوقت ما كنت أعرف أترجم لأن محصلتي اللغوية كانت جدًا ضعيفة. خاطرت أول مخاطرة بحياتي، وحولت اللغة إلى الإنكليزية.

أي خيار واجهني أو كلمة ما عرفت أترجمها، حاولت أبحث عن معناها وأفهمها، مثل Team وSolo.

وبعدها تذكرت أني لما كنت ألعب نفس اللعبة باللغة العربية، كان يظهر لي هذا الخيار. اخترت المود اللي أحبه، وكملت على هذا المنوال لحد ما خلصت لعب وطلعت.

أول ما رجعت للبيت، ضليت أفكر: هل من المعقول أني كنت أصرف فلوس على كورسات مدفوعة، وكنت أعتقد أني فاشل لأن ما كنت أفهم وما كنت أقدر أعبر؟

الجواب اللي لقيته كان بسيط: المشكلة مو بنفسي، ولا بالكورسات، المشكلة بطريقة التعليم نفسها.

باليوم الثاني عجبني هذا الموضوع، واشتريت دفتر جديد، وكلت أدون بيه أي كلمة أشوفها قدامي تكون داخل جملة، وأحفظها.

وفعلًا، ضليت على هذا المنوال تقريبًا أسبوع، ولاحظت أن محصلتي اللغوية تطورت بشكل رهيب. بعدها كلت: خلي أطور من نفسي وأستمع إلى بودكاست بسيط.

وصراحة، أول ما سمعت البودكاست، كنت أفهم المعاني بنسبة 40% وأترك الكلمات الجانبية. أما الكلمات الرئيسية اللي يمشي عليها حوار البودكاست، فكنت أحاول أدونها مع الجملة، وأطلع معناها وأفهمها.

ضليت على هذه الحالة فترة طويلة، وفعلاً لاحظت تحسنًا كبيرًا جدًا بلغتي. صرت أفهم الكلام اللي ينكال، وقدرتي السمعية للغة تطورت بشكل رهيب من خلال البودكاست والاستماع.

هسه نجي إلى مرحلة التطبيق، بدورك أنت كقارئ، شلون راح تطبق هاي الطريقة بالتفصيل؟

أول شي، تطوير الحصيلة اللغوية. لازم تحفظ هواي معاني، لكن على شكل جمل، وتطبق طريقة (5×5×5).

هاي الطريقة عبارة عن:

- تقرأ الجملة خمس مرات.

- تكتبها خمس مرات.

- تحاول تلفظها من دون ما تشوفها خمس مرات.

وتستمر على هاي الطريقة إلى أن تزيد حصيلتك اللغوية، وأهم شي تحفظ الكلمات داخل جمل، مو بشكل منفصل.

مثال:

I eat breakfast at 7:30.

وتكمل على هذا المنوال، وهيج راح تكدر تزيد حصيلتك اللغوية بشكل تدريجي.

هسه نجي إلى البودكاست والاستماع. لازم تسمع بودكاست، لأن من الصعب جدًا تتكلم أي لغة بطلاقة بدون ما تسمع أصحاب اللغة الأصلية. وفائدة البودكاست، باختصار، أنه يعلمك النطق الصحيح للكلمات مثل ما ينطقها أهل اللغة، وأيضًا يساعدك على فهم المعاني وطريقة استخدام الكلمات في سياقها.

أما طريقة الاستماع، فتكون بمحاولة فهم أكبر عدد ممكن من الكلمات، وترك الكلمات الجانبية، والتركيز على الكلمات الرئيسية اللي يمشي عليها الحوار. وإذا حسيت أن كلمة معينة جدًا مهمة، حاول تطلع معناها وهي داخل جملة، وبعدها احفظها باستخدام طريقة (5×5×5).

وهسه راح أكلك ليش راح تنجح هاي الطريقة بينما فشلت وياك الكورسات والدورات.

ببساطة، لأن أغلب الكورسات والدورات تعتمد على تعليم المعاني، والنطق، والقواعد، لكن إذا كان هدفك إنك تتكلم اللغة بطلاقة، فهذا وحده غالبًا ما يكون كافي. برأيي، الكورسات والدورات مفيدة لتعلم القواعد وبناء الأساس، لكن لازم تطبق اللغة بشكل عملي حتى تتطور مهارة التحدث والاستماع.

النصيحة اللي أحب أنصحك بيها: ابدأ من هسه، لا تأجل. أكو أشخاص كانت بدايتهم مثل بدايتك، ويمكن حتى كانت ظروفهم أصعب، واليوم يتكلمون اللغة بطلاقة. وأكو ناس تعلموا لغة كاملة، وبعدها بدؤوا يتعلمون لغات ثانية بنفس الطريقة.

وتذكر دائمًا، الاستمرارية هي سر النجاح. مهما كنت موهوب، إذا ما تستمر ما راح توصل. حاول تتعلم كل يوم لمدة نصف ساعة، وإذا كان عندك حماس أكثر، كمل ساعة. المهم مو عدد الساعات، المهم إنك تستمر يوميًا بدون انقطاع.

وبالنهاية، أحب أكلك إن تعلم أي لغة مو مستحيل، ولا يحتاج تكون عبقري أو عندك موهبة خارقة. كل اللي تحتاجه هو طريقة صحيحة واستمرارية. لا تنتظر الوقت المناسب، ولا تدور على الطريقة المثالية، لأن أفضل وقت تبدأ بيه هو اليوم.

يمكن بالبداية راح تواجه صعوبة، ويمكن راح تحس إن تقدمك بطيء، لكن إذا استمريت يومًا بعد يوم، راح تتفاجأ بعد فترة بكمية الكلمات اللي صرت تعرفها، وبقدرتك على فهم اللغة والتحدث بيها.

وأخيرًا، تذكر أن اللغة مهارة، والمهارة ما تتطور بالحفظ فقط، وإنما بالممارسة اليومية. ابدأ بخطوة بسيطة، واستمر عليها، وبعد أشهر راح تشوف الفرق بنفسك.

أتمنى يكون هذا المقال فادك، ولو بشيء بسيط، ويكون سبب يخليك تبدأ رحلتك بتعلم اللغة من اليوم، مو من باچر.