وقتها كنت نازلة على السلم، وعندي النور مؤقت بينوّر وقت صغير ويفصل أوتوماتيك. فـ وقتها خوفت أوي أوي، ومن غير تفكير قررت أعمل نفسي مش خايفة عشان لو في عفريت ورايا مياخدش باله 😅.
وفجأة افتكرت حاجة مهمة أوي عمري كله مخدتش بالي منها؛ إن الشياطين والجن مبتسمعش تفكيرنا من جوا بجد! صح؟ 😅😳🤦🏻♀️
إزاي مخدتش بالي من ده؟
ورجعت بتفكيري أوي.. اللي هو: يعني كل المعاصي والذنوب دي إزاي؟
معقول الشيطان مبيعملش حاجة غير إنه يوسوس؟
أومال لو كان بيسمع اللي بنفكر فيه كان عمل إيه!
بس ثواني.. فهمت إن كل دي أفكار دخيلة على عقلنا من الخارج من الشيطان،
إحنا متولدناش بيها. يعني إنت عبارة عن صندوق، والشيطان هو اللي بيحاول يعبّي جواك إيه: حقد، حسد، غيرة، طمع، جشع، شهوة...
بس معقول الشيطان فاهمني للدرجة دي؟
يعني واخد باله كل واحد فينا محتاج يلوّثه من جوا بـ إيه؟
فهمت ليه الناس غرقت في الذنوب؛
لأن الشيطان شبه السماعة اللي ماسكة في ودانك ليل نهار، وحافظك هتعمل إيه حالاً.
بس ثواني.. إزاي في ناس مبتسمعلوش؟
المقصود إن ربنا إدّانا قوة عليه وسلطة توقّف زنّه ده علينا. لو رجعنا للقرآن هنفهم إن مجرد قول
"أعوذ بالله من الشيطان الرجيم" بتوقفه، ولو برضو الصوت عالي، خد "الفيتامين" وهو الأذكار.
في حد ممكن يقولي: "لا، في ناس أصلها وحشة"، والله أعلم بده، بس لو رجعنا لولاد سيدنا آدم كانوا نوعين: خير وشر.
حاسة إني محتاجة أفهم عن الموضوع ده أكتر، لأن أي مصدر خارجي لصوت هيفضل شغال على ودني من أول ما أصحى لحد ما أنام، أنا أقدر أفصله صح؟
وربنا قالنا على كل الطرق: صلاة، ذكر، وقرب من رب العالمين. وتأكدت إن فعلاً الشيطان مبيسمعناش من جوا، والدليل قوله تعالى:
﴿وَلَقَدْ خَلَقْنَا الْإِنسَانَ وَنَعْلَمُ مَا تُوَسْوِسُ بِهِ نَفْسُهُ ۖ وَنَحْنُ أَقْرَبُ إِلَيْهِ مِنْ حَبْلِ الْوَرِيدِ﴾
وكمان آيات كتير بتدل على إن ربنا الوحيد اللي بيسمع حوارنا كل يوم مع نفسنا، مش جن ولا شياطين.
ومن تفكيري البسيط حالاً -واللي محتاج أفكر فيه أكتر وأفهمه أعمق- استوعبت إن الشيطان ده تافه أوي.. آه والله! مجرد سماعة. عارفين شبه إيه أوي؟
فاكرين بياعين الشارع في العيد لما يفضل ينده: "بـ 20 جنيه.. الـ 4 شرابات بعشرين جنيه" ويشغّلها تسجيل؟ 😅 أهو هو ده الشيطان؛ مجرد تردد وزنّ على ودنك ليل نهار، ساعة، دقيقة، ثانية!
يبقى الحل بسيط: اطفيه.. دوّر على الزرار واطفيه!
واوعى تنسى "نفسك"، لأنها برضو متحاصرة من قرينك اللي الشيطان بيضحك عليه أكتر منك. إحنا في دوامة لو مفوقتش لنفسك هتضيع...
"اللهم إني أعوذ بك من شر نفسي، ومن شر الشيطان وشركه، وأعوذ بك ربي أن يحضرون."
يلا كلنا نقولها ونطفي الزرار، ولو لسه الصوت موقفش، اذكر الله كتير وحصّن نفسك بالأذكار ❤️.
التعليقات