هو أنت ليه زعلان عشان حاجة واحدة بس محصلتش؟
تعرف.. أنا كمان كنت زيك في يوم وبحسبها كدا، لحد ما حصل موقف خلاني أبص للأمور بمنظور مختلف.
يعني مثلاً.. فكر وبص كدا حواليك، ودور على شخص كبير في السن وراقب شريط حياته وركز..
هتلاقيه بيقولك: "دا أنا كنت مثلاً بلعب كورة حلو أوي!"
وفعلاً هو مش بيكذب، وله تاريخ يقول إنه كان محترف مجهول على الأرض، ورغم كدا فضل مجهول.
ونفس الشخص دا بيحكي إنه جاله في الدراسة مدرسة طيران، وفعلاً نجح في كل اختبار واجتاز.. بس حصلت حاجة قدرية عطلته إنه يبقى بينهم.
وتيجي تبص تلاقيه دلوقتي مجرد بياع أو مجرد قهوجي.. حاجة كدا تحسها متستحقش كل الحاجات والمؤهلات اللي بتقول إن الشخص دا كان المفروض يبقى بين ناس مشاهير حالياً!
بس لما تيجي تسأل الناس دي بعد ما تنضج وتكبر، وتبص للدنيا بعين الزوال (وهما رجل برا ورجل جوا زي ما بيقولوا)، تلاقيه بيقولك:
" لو خيروني ارجع لكل دول كنت اتمني ابقي نفسي دلوقتي كان لازم دا يحصل.. لو دا مكنش حصل كنت هبقى هنا ازاي؟ كانت شريكه حياتي دي هتشوفني فين ،،كنت هبقى أبو البنت والولد دول ازاي؟ ؟"
فـ هو أنت زعلان أوي كدا ليه؟
كل دا مكتوب.. وفر مجهود التفكير في أمور أصلها اتكتب خلاص..
لا تزعل على اللي فات، ولا توقف حياتك عليه.