العنوان بحد ذاته مبهم! هههه بعرف.
رح احكي بالعامية بعيدا عن الفصحى، يمكن تكون اقرب ويمكن لأ، ويمكن ناس تحب الموضوع وتشارك فيه ويمكن لأ!
انا لسه عزابي، ما دخلت القفص الاحمر تبعهم! بس اذا الله اكرمني ودخلت القفص الابيض تبعهم رح اقترح على مرتي (بدون فرض) انه نلغي فكرة الصالات (سوءا خطبة او زواج) ونستبدلها بجمعيات خيرية او البيوت نفسها، ونستغل فلوس الصالات ونسافر شهر عسل. واي نت؟
والله ما بعرف في ناس رح ترفض بشكل قاطع بحجة (الصالة للعروس وبدها تفرح) يا سلام! يعني انا مضطر امشي بالعادات والتقاليد (بعضها غبية) وامشي (مثل الناس ماشية بحياتها) واعمل متلها؟ لا طبعا مش مضطر! فرصة انه بزمن الكورونا بعض الناس ما عملت لا صالات ولا اشي بالعكس اقتصرت على البساطة وما احلى العرس. بالعكس حتى بركة كمان بالحياة الزوجية. وغير كورونا في قصص كثيرة!
يمكن بعض الناس تحكيلي لأ ما بصير لازم العروس تفرح وتنبسط، ياسلام هو انا رح امنعها؟ بالعكس الالف والالفين والاكثر بدل ما احطهم لصالة ساعتين زمن (ويكون في الصالة حدث ولا حرج من تصوير وتخبيص وترندات وكلام رايح جاي وانتقاض انتقاص وكلام ماله داعي وهاد حكى وهديك خبصت وثالث تصرف والكيك رخيص ومش زاكي او الكيك غالي والعريس معه مصاري وهاي لبست وهديك مكياجها مو حلو وووو) طيب الله الغني بهاد الحكي كله والله!
مش بالضرورة اكون متل الناس والله، هاي مش عادات ولا تقاليد، هاد انا اسميه (بعزقة) فلوس وانا بامكاني استغلها لصالحنا ولحياتنا!.
يمكن في ناس ترفض بشكل قاطع وهاد حقها وهي حرة، لكن انا مش بالضرورة اكون متل الناس او اعمل متلهم.
هل من مؤيد؟ او هل من معارض؟ وليش؟
فرصة نفكر خارج الصندوق واشوف الاراء الاخرى... وبس والله
والسلام.
التعليقات