مفتقد للقدوة الابوية

اعتذر عن الكتابة بالعامية نظراً لان النص كان الغرض الاصلي منه تدوين افكاري و ليس نشرها هنا.

انا مفتقد للقدوة الابوية في حياتي - حاسسها مش كلمة شلئعة بس اللي بيقولوا عليها بالانجليزي: Father Figure.

بابا قاعد في البيت بقاله حوالي 14 سنة - بينزل يوم في الاسبوع او اتنين بالكتير - عمره ما بيقعد يتكلم معايا الا لو عايز يقعد يحكي قصص من الذي مضى لكن عمره ما علمني حاجة تنفعني فعلا - يعني عمره ما بياخدني معاه و هو بيشتري حاجة (او بيبيع بما انه حاليا مصدر دخله الشقق اللي بيبيعها في العمارة اللي بناها من ييجي 10 سنين) - عمره ما ناقشني في حاجة و لا اخد رأيي في حاجة و لا سمع مني - لسه متخانقين من كام يوم بسبب حاجة كان فاهمها غلط لمدة 6 سنين و كانت حاجة فارقة في حياتي.

انا يبان من كلامي اني بشتكي من تعامله معايا و انا للأسف بعمل كده لأنه حرمني انا و ماما و اخويا من ان بيتنا يكون بيت دافي - بس ان شاء الله اقدر اعوض ده في بيتي و اقدر اعوضهم هم كمان يوما ما - لكن انا بحس اني مش راجل كفاية - انا مفيش حد علمني ازاي اتكلم مع الناس - ازاي اخد حقي.