السلام عليكم ورحمة الله وبركاته،
حابب أشارك معاكم تجربة شخصية شغال عليها بقالي أكتر من 7 شهور، وأسمع آراء الناس اللي عندها خبرة في البرمجة وإدارة السيرفرات.
بس قبل ما أبدأ، خليني أحكي نبذة بسيطة عن نفسي عشان الصورة تكون واضحة.
أنا خريج حاسبات ومعلومات دفعة 2012، لكن علاقتي بالبرمجة بدأت من قبل الدراسة بكتير، تقريبًا من سنة 2008، من أيام معهد ترايدنت ومنتديات الـVB والسكربتات والتعديلات اللي كنا بنقعد بالساعات نجرب فيها 😂❤️
يعني البرمجة بالنسبالي بدأت كهواية وحب للمجال قبل ما تكون دراسة أو شغل، والحمد لله اشتغلت فيها بعد كده، ومع الوقت دخلت في مجال السيرفرات والاستضافة وبقى عندي شغل خاص في المجال.
طيب إيه علاقة ده بالذكاء الاصطناعي؟
من حوالي 7 شهور بدأت تجربة مختلفة شوية.
بحكم إني بستخدم سيرفرات خاصة للتجارب والاختبارات، كنت محتاج لوحة تحكم تسهّل عليا إدارة المواقع والخدمات بدل ما أحتاج أشتري تراخيص للوحات مدفوعة لمجرد إني بجرب على سيرفر Local.
فقلت ليه منجربش نبني لوحة تحكم خاصة بينا، ونستفيد من الـAI في اختصار وقت التطوير؟
ومن هنا بدأت الحكاية 😂
الموضوع مكنش مجرد Prompt كتبته وطلعتلي لوحة تحكم، إحنا بنتكلم عن شهور من الشغل بين برمجة يدوية وVibe Coding ومراجعة للكود وتجارب وتعديلات.
وكل ما نخلص جزء نكتشف إن فيه أجزاء تانية مرتبطة بيه.
طيب وصلنا لإيه لحد دلوقتي؟
اشتغلنا خلال الفترة اللي فاتت على مجموعة من الأنظمة، منها:
- إدارة حسابات الاستضافة والباقات والموزعين وتحديد موارد كل حساب.
- إدارة المواقع والدومينات وDNS وشهادات SSL وقواعد البيانات والبريد الإلكتروني.
- إدارة الملفات والنسخ الاحتياطية والخدمات.
- أدوات خاصة بإدارة استضافة WordPress.
- نظام Migration للنقل من لوحات زي cPanel وPlesk وDirectAdmin وغيرها.
- نظام تحديثات عن بُعد للوحة التحكم، منفصل عن تحديثات نظام التشغيل وحزم السيرفر.
- أدوات للحماية زي Fail2Ban وModSecurity WAF، ولسه بنشتغل على تطويرها واختبارها.
وطبعًا مش معنى إن المميزات دي موجودة إننا خلصنا المشروع أو اختبرنا كل حاجة بشكل كامل.
لكن من التجارب اللي نجحت معانا فعلًا إننا قدرنا ننقل موقع صغير من cPanel للوحة الجديدة واشتغل، ولسه اختبارات النقل الأكبر قدامنا.
وهنا بقى الجزء اللي أنا مهتم أتناقش فيه معاكم.
أنا بحكم خبرتي في البرمجة عارف إن كتابة الكود مش أصعب جزء في أي نظام كبير.
الأصعب إنك تعمل نظام مستقر وآمن وقابل للتطوير، وتعرف تتعامل مع المشاكل اللي مش هتظهر غير لما النظام يتحط تحت ضغط حقيقي.
خصوصًا إننا هنا مش بنتكلم عن موقع عادي، إحنا بنتكلم عن لوحة ممكن في يوم من الأيام تكون مسؤولة عن إدارة سيرفرات ومواقع وبيانات عملاء.
يعني أي خطأ في الصلاحيات أو عزل الحسابات أو التحديثات ممكن تكون عواقبه كبيرة.
وعشان كده حاليًا كل التجارب على سيرفرات خاصة بينا، ومفيش نسخة عامة بنطلب من الناس تعتمد عليها.
هل الهدف إننا ننافس cPanel فعلًا؟
بصراحة الفكرة بدأت كاحتياج شخصي، لكن مع الوقت والتطور اللي حصل بدأنا نفكر ناخد المشروع بشكل أكثر جدية.
قررنا نكمل تطويره، لكن هل هنقدر نوصل لمنتج ينفع نعتمد عليه تجاريًا؟ ده لسه الاختبارات هي اللي هتجاوب عليه.
وأنا مش شايف إننا لازم نعيد اختراع العجلة، بالعكس فيه لوحات كتير مفتوحة المصدر ومنتجات قوية موجودة من سنين، وكل واحدة وراها خبرة وتطوير مستمر.
بس السؤال اللي شاغل بالي فعلًا:
هل الـAI مع مبرمج فاهم المجال وعنده خبرة كافية ممكن يختصر سنين من التطوير، ويساعده يبني منتج معقد بالمستوى ده؟
ولا مهما اختصر وقت كتابة الكود، هتفضل فيه تحديات محتاجة فريق وخبرات واختبارات على مدار سنين؟
أنا مش بقول إن الـAI بديل عن المبرمج، ولا مقتنع إن مجرد إنك تعرف تكتب Prompt يخليك قادر تبني أي نظام.
لكن في نفس الوقت مش هقدر أنكر حجم الوقت والمجهود اللي وفره ليا خلال التجربة.
وعندي كام سؤال حابب أسمع رأيكم فيهم:
- لو أنت صاحب شركة استضافة، إيه أهم حاجة ممكن تخليك تفكر تجرب لوحة جديدة بدل cPanel أو DirectAdmin؟
- من وجهة نظرك كمبرمج، إيه أصعب تحدي في بناء Hosting Control Panel غير كتابة الكود نفسه؟
- هل شايف إن الـAI فعلًا بقى يقدر يساعد مطور مستقل ينافس في مشاريع كانت زمان محتاجة فرق عمل كاملة؟
وأحب أوضح إن الموضوع مش إعلان عن منتج، ولا عندي تراخيص للبيع أو نسخة عامة جاهزة حاليًا.
أنا هنا عشان أشارك التجربة وأسمع من الناس اللي اشتغلت في المجال، ويمكن حد ينبهنا لحاجة إحنا مش واخدين بالنا منها.
وأكتر حاجة تهمني أسمعها من أصحاب الخبرة: لو كنت مكاني، إيه أول حاجة هتركز عليها قبل ما تفكر تطلع النظام للاستخدام الفعلي؟
وشكرًا مقدمًا لكل حد هيشارك برأيه أو تجربته ❤️
التعليقات