أولا ي باشا شايف الصورة اللى تحت دي ما لكش دعوه بيها دلوقتي عشان تقرأ البوست :D ..

الاساس العام في الفيزياء الكلاسيكية (نيوتن وجماعته ) قائمة في الاساس على كتلية المادة ..بمعنى ان المادة (كل المادة الموجودة ف الكون ) جسيم يخضع للقوانين العامة اللى بتحكم الحارة دي زي مثلا يبقي الجسم الساكن ساكن والمتحرك متحرك مالم تؤثر عليه قوة خارجية او زي مثلا النشيد العام لنيوتن اللى كلنا حافظينه لكل فعل رد فعل مساوي له في المقدار ومضاد له في الاتجاه وهكذا ...دي قوانين ومحكمات كلها بتقود الى ان المادة ما هى الا جسيم يخضع في كل حالاته الى تلك القوانين المنبثقة :D ( المستنتجة يعني ...حبيبي ) من التحليل الرياضي البسيط ..والكونسبت السهل بتاع خد تاكس للحوار نلف وندور وتنسورات وفيكتورات :D ونتفلسف ليه

والكلام ده المجتمع العلمي فضل مصدقة لما يقرب من نصف قرن من الزمن وذلك لانه من حمل لواء هذا الافتراض هو العظيم اسحاق نيوتن .....تمااااااام انت كده فله اركن بقي الحوار ده وتعال نتكلم في حاجه تانيه

لو انت عاوز تفرض عكس الكلام ده وتثبته وتتفوق على واحد بشهرة نيوتن يبقي انت ( بجانب انك لازم تكون محظوظ وفي مجانين كتير زيك ومش هتعتمد ع الهري النظري بتاع الفيزيا النظرية بس ) لازم ( زي ما قلنا البوست اللى فات ..) لازم تثبت ان نظرياته بتعطي تنبؤ خاطئ او مش بتنطبق على ماده بعينها في الكون ....طبعا يا صديق لو جيت تتكلم عن ماده فيها الشذوذ كله :D ( مادة ماشية شمال ف الكون ومحدش بيلمها ) ويمكن ان تخضع (بضم التاء يعني) لها نظرية وعكسها في نفس الوقت مش هتلاقي الا برنس الجيل - رمز الفتونة في الكون الا وهو الضوء ...

مسكوا ي نجم الضوء ده وبعد دراسات متعمقة لقيوا انه ليس جسيم في الاساس وانما هو موجات ...اوبا بقى :D ...وطلعت نظريات كتير بتتكلم عن الطبيعة الموجية للضوء ...لكن في الحقيقة لم تكن هناك نظرية يمكن ان تعطي تصور كامل عن طبيعة الضوء وسلوكه ف الاوساط المختلفة - اصلهم لعبوا مع الكبير - ( وبكده لفظا يعني جه يكحلها عماها :D ) وبدل ما تكون دراساتهم للضوء نقطة تقوية للفيزياء النظرية... بدا وكأنه سيكون القشة التى قسمت ظهر البعير ( يعني اللى هيخلى الناس تشوفهم مجموعه من الفشلة بزيادة :( ) وفضلوا يكابروا ويتخانقوا الضوء موجه ولا جسيم

المهم ي سيدي ...في سنه 1923 جه واحد اسمه لويس دي بروجلى ( الراجل ده نجم بس مالوش حظ يتشهر ) قالهم طب نتخانق ليه ...وقال : ( مادة الجسيم يمكن ان يكون لها نفس خصائص الموجه ) يعني الضوء موجة وجسيم ..( طبعا في حقبة في ناس بتتعتمد ع التجربة وناس تانيه بتعتمد ع الفروضات ) لا مجال للصلح بطريقة انتي روزمه وانا روزمه دي :D ... فمحدش صدقه تقريبا

مع انه هو كلامه صح 100% وده اللى اتثبت بعد كده

الحزب الحاكم في الفيزياء ( رجالة نيوتن ) كان بيطلعوا لسانهم ويقولوا عندنا معادلات وانتوا لأ ...فلو الفيزياء النظرية حابه تكمل وتثبت مكانه في الساحه وتمسك الحديدة :D يستنتجوا معادلة تكون بمثابة قوانين الحركة في الفيزياء الكمية وقد كان ....وسع ...وسع ...وسع ...الحج شرودنجر وصل

بص بقي الصورة اللى تحت صورة لاهم معادلة في الفيزيا الكمية ( اه اهم حتى من معادلة الكتلة والطاقة بتاعة عم الناس دول اينشتاين ) معادلة ارفين شرودنجر ( نام سنه في المعمل طلع لهم بالشغل الواعر ونشر النظرية سنه 1926 ) وطبعا مش هنخوض في تفسير التنسورات والمعاملات اللى قدامك دي عشان ده عاوز ورقة وقلم وقرش حشيش :D

المهم وصلوا في الاخر لقعدة كده واتفقوا ان مافيش مانع اننا نتفق على ان الضوء له طبيعة مزدوجة

وانه مالوش كبير

دومتم مطلعين يا حبايب :D

(اه ...انا مش متخصص في الفيزيا ..بس بنحاول نفهم مع بعض :)

لايك وادعم الفكرة :)

وشير في الخير ممكن توصل لحد يبسط الفكرة احسن

CeSaR2017

تعال_أبسطهالك