فكرة إنك تتعلم لغة برمجة لمجرد التعلّم فقط ولإنها مغرية والكل يمدحها غير مُجدية أبداً،

السؤوال الأهم ليش تبغى تتعلم اللغة الفلانية ؟ جاوب عليه ببساطة ..

تبغى تسوي خدمة ويب ولديك فكرة برآسك وترغب في تنفيذها .. إختر أحد لغات البرمجة المخصصة للويب وإبدأ تعلم البرمجة أثناء تنفيذ مشروعك الخاص، يعني إتعلم على مشروعك .. فكرة إنك تتعلم اللغة وتطبق الأمثلة الموجودة في الكتب أو الدروس فكرة مملة جداً وطبيعي ما راح تستمر ..

إذا حاب تسوي تطبيق جوال، إختر اللغة المناسبة للنظام اللي تبغى تعمل له التطبيق وإبدإ نفّذ أثناء التعلّم .. لا تبدأ تتعلم لغة وإنت مو برآسك أي فكرة لأي مشروع ولا تدري إيش تبغى .. حدد الهدف أولاً ورتّب فكرة برنامجك على الورق وكأنك فعلاً مبرمج وقادر على تنفيذه .. ثم إختر اللغة وإبدأ نفّذها أثناء التعلّم .. بعد ما تنتهي من البرنامج تكون قطعت أكثر من نصف المشوار ويمكن في الأخير البرنامج بيكون تعيس ولا يصلح للنشر ولكن على الأقل حققت هدفك وتعلمت اللغة وبسهولة تقدر تبدأ في إنتاج برنامج جديد بشكل أسرع مع تفادي الأخطاء السابقة.

أوّل ما تعلمت البرمجة قررت إني أتعلمها عشان بس أسوي موقع خاص فيا! بعد ما عانيت من السكربتات الجاهزة وكانت أيامها (مجلة نيوك!) وعملت الموقع وأطلقته وهذه كانت البداية الفعلية .. والآن أنفذ نفس الشيء على تطبيقات الجوّال .. من الأخير حدد هدفك قبل ما تبدأ تتعلم .. كل لغات البرمجة شخصياً أشوفها مغرية إني أتعلمها لكن في الأخير الأهم إنه ما نضيع وقتنا إلا في الشيء اللي يفيدنا شخصياً ونحقق من وراه إنجاز ملموس.