فى مفهوم مهم عايز اوصله ليك أو لكل شخص نفسه يعمل مشروع ناجح وقوى فى البرمجة ... الفكرة مش انك تشتغل فى نظم التشغيل أو لغات البرمجة عشان تعمل مشروع قوى أو مهم ... الفكرة إن يكون عندك فكرة جديدة إنت شايف إنها مفيدة ومهم أنك تطبقها ... نجاحك بعد توفيق ربنا بيكون متوقف على اسباب من ضمنها "أهمية الفكرة دى" ... مش بس أنت قد ايه قوى فى البرمجة وخبرتك عاملة ازاى ... ودى أمثلة عملية خليك فاكرها دايما

(1) فى عام 1993 مبرمج يابانى إسمه Yukihiro Matsumoto قرر أنه يعمل لغة برمجة جديدة إسمها Ruby يجمع فيها أجمل الصفات الى شافها فى لغات البرمجة التانية ويطبق فيها أفكار جديدة تزود الإنتاجية وتكون لغة جميلة ونجح انه يطلع أول إصدار من اللغة سنة 1995

(2) فى عام 2004 مبرمج من الدنمارك إسمه David Heinemeier Hansson قرر إنه يستخدم لغة الـ Ruby بدل PHP للمزايا الموجودة فيها ويعمل Framework إسمه Ruby on Rails يطبق فيه أفكار هو شايفها هتزيد من الانتاجية فى تطوير تطبيقات الويب.

(3) فى عام 2006 أربع مبرمجين استخدموا Ruby on Rails لعمل موقع Twitter

ايه المهم فى الـ 3 تجارب دول ؟

  • الهدف مش انك تعمل نظام تشغيل او لغة برمجة وإنما تطبق فكرة جديدة

  • الأفكار الجديدة اتبنت على بعضها مش كل واحد كان بيعيد إختراع العجلة

  • فى ناس كثير ماتعرفش Ruby ولا عمرها اشتغلت على Ruby on Rails وصدقنى منهم مبرمجين لكن الكل عارف Twitter حتى لو مالوش حساب عليه.

  • مبتكر لغة الـ Ruby عنده النهارده 49 سنة يعنى بدأ فى اللغة وهو عنده 28 سنة وانتج اول اصدار منها وهو عنده 30 سنة ... يعنى مش لازم يبقى شعرك أبيض عشان تعمل لغة برمجة جديدة.

  • مبتكر Ruby on Rails عنده النهارده 35 سنة يعنى عمل إطار العمل وهو عنده 24 سنة ... وده عمل شىء مهم جدا وهو أنه إكتشف Ruby ونجح فى استخدامها لتوظيف أفكاره يعنى خلى دايما عندك إطلاع على التقنيات الجديدة بصرف النظر عن شهرتها.

  • مبتكرين Twitter عندهم النهارده من 38 سنة الى 43 سنة يعنى المشروع بدأ وهما فى بداية الثلاثينات من عمرهم وكان عندهم الشجاعة انهم يستخدموا Ruby و ROR يعنى طبقوا فكرتهم الجديدة بأدوات جديدة.

  • لغة Ruby مش دايما ملاك ... فيها مشاكل ومع ذلك "قصة نجاح" وده كمان ينطبق على كل من ROR و Twitter ... يعنى النجاح مش شرط له "الكمال" وانما "القيمة" و فى عالم الـ Software التطوير دايما مستمر ومالوش حدود.

  • بصرف النظر عن بداية المشاريع دى كأعمال فردية او فريق عمل صغير ... النهارده فى مجتمعات للمشاريع دى وفرق عمل كبيرة.

  • الى عملوا Twitter كسبوا أكثر "ماديا" و "شهرة" وحلوا مشاكل برمجية معقدة مايعرفهاش أغلب الطلبة فى الـ Computer Science الى عارفين قد ايه التحديات كبيرة فى نظم التشغيل ولغات البرمجة لكن المناهج غالبا لسه ماعرفتهمش على التحديات الى بيواجها Twitter او Facebook وغالبا بيتم التركيز عليها فى مراحل دراسية زى الماجستير او الدكتوراه.

  • طبق أفكارك الجديدة طالما انت شايف انها هتبقى مفيدة ... ماتفكرش بس فى الفلوس ... أو فى المكانة العلمية ... فكر فى منفعة الناس