الالتحاق بالجيش إجباري فلا يجب التفكير كثيراً في إذا كان مفيد للشخص نفسه أم لا ، فهو لم يصنع لفائدة الشخص بل لفائدة المجتمع. عليك بالانتهاء منه، فما تشعر به يشبه إلي حد ما تأجيل المهام.
من يفكر في الجيش يفكر فيه ليقرر هل سيقدم أصلاً أم لا، لي أصدقاء تخلفوا عنه ولم يقدموا أوراقهم.
أنا فاهم إن الموضوع إجباري فعلاً، ومش بقول ألغيه أو أهرب منه، أنا بس بحاول أفهم هو بيضيف إيه لحياتي كفرد عنده شغل وطموح ومسؤوليات.
الفكرة مش في تأجيل حاجة، أنا بعمل وأتحمل مسؤولية من زمان، لكن الطبيعي إن أي حاجة تاخد من وقتي توقفني أو تأخرني لازم أسأل: هل مقابل ده في إضافة حقيقية ولا لا؟
وبالنسبة للي بيقرر يقدم أو لا، دي وجهة نظره وظروفه، لكن أنا هنا مش بسأل هل أقدم أو أتهرب، أنا بسأل: هل التجربة دي بتديني حاجة فعلًا ولا مجرد التزام لازم نعدي منه وخلاص؟
يعني باختصار: أنا مش بنقاش فكرة الالتزام، أنا بنقاش القيمة اللي هترجعلي من التجربة دي.
من واقع الي شفته عن نفسي فالجيش مش بيعمل رجال يتحملوا المسئولية هو بيعمل رجال بيقولوا حاضر ونعم بسهولة من غير مناقشة وتفكير كتير، والشخص الي بيتحمل المسئولية مش محتاج خدمة عسكرية لأن تحمل المسئولية ده قرار داخلي لازم الشخص نفسه هو الي ياخده مش يتفرض عليه
أنا فاهم قصدك، لكن أنا ما كنتش بتكلم عن إن الجيش “يعمل” المسؤولية من عدمها.
أنا بتكلم عن إن فيه ناس أصلًا عندها مسؤولية وبتشتغل وبتبني حياة، ومع ذلك بتتوقف بسبب حاجة مش مرتبطة مباشرة بقدرتها أو شغلها.
فالفكرة بالنسبة لي مش هل الشخص بيتعلم المسؤولية ولا لا، لكن هل في نظام بيضيف له فعلًا… ولا بيقف قدامه ويأخره.
قولّي بقى بصراحة وناقشني ، إيه الحاجة اللي شايف إنها كانت إضافة حقيقية في الجيش بالنسبة لك ؟