كلمني في اليومين الماضية احد اعز اصدقائي يشتكي لي من دوامه وكيف كاره الدوام ويبي يطلع برا السعودية، يبي يدرس احد التخصصات اللي طالما حلم بدراسته في أمريكا ويصبح الإنسان الذي يريد.
السالفة خلتني افكر شوي بالموضوع، لو نشوف مثلا في امريكا او في الغرب بشكل عام دائما يشجعون على التغييرلدرجة انه صار جزء لا يتجزأ من الثقافة، بس نجي عندنا هنا بالعالم العربي، طبعا بتكلم انا عن السعودية بحكم انها بلدي وعايش فيها، مافي ولامثل يحضرني الان يحثني على التغيير بل ان كثير من الامثال تحثك على عدم التغيير مثل (العود من اول ركزه) مع وجود اية في القرآن تحث على التغيير: {إِنَّ اللّهَ لاَ يُغَيِّرُ مَا بِقَوْمٍ حَتَّى يُغَيِّرُواْ مَا بِأَنْفُسِهِمْ}، واتوقع كل واحد فينا سمع او عرف احد مر بنفس التجربة السؤال اللي اسأل فيه نفسي ليه ارتبط التغيير كثيرا بالخروج من البلد؟.
حللت الموضوع بطريقتي فوجدت التالي:
· الثقافة الدارجة في المجتمع عن التغيير ماهي منتشرة وخجولة لدرجة اللي يحاول يتغيرفي اي شي بيلقى وابل من النصايح والامثال اللي تثبط من معنوياته مثل (خلك على قردك لا يجيك اللي اقرد منه).
· المقاومة اللي بيلقاها من الجامعة او اماكن العمل بتكون قوية جدا والسبب باعتقادي هو انعدام الوعي باهمية التغيير وقلة الدعم شخص او تشجيعه على ذلك ابسط مثال حاول تغير مجال شغلك او الصناعة اللي تنتمي لها وراح تشوف العجب واللي يثبت كلامي شرط امتداد التخصص في الابتعاث او في الجامعات الحكومية.
· اذا فشلت مافي احد راح يرحمك .
اتمنى اكون ماطولت عليكم ... عطوني رأيكم اتوقع كل واحد مننا مر بتجربة مشابهة او يعرف احد مرفيها.
سلام ،،،،
