نقطة مهمة جدا لكل واحد في مجال العقارات او ناوي يدخل في المجال – معظم ملاك العقارات فالأغلب وقت شرا العقار بيكون فعليا مش عارف هو بيشتري ليه!! دي حقيقة، شراء العقارات أصبح سلوك تلقائي لمعظم الناس اللي قدرت تحوش قرشين من شغلهم او اعمالهم، ودا مش غلط لو اخدنا في اعتبارنا ان الاستثمار في العقارات بيعتبر من أكتر انواع الاستثمارات اطمئنانا واستقرارا وهو اتجاه في حد ذاته مظبوط بنسبة كبيرة لكن المشكلة الكبيرة هي عدم وجود هدف واضح ليك وانت بتشتري العقار!! والنتيجة ظواهر كتير بنشوفها قصادنا يوميا من أهمها وجود شقق وفيلات وعقارات مختلفة "مقفولة" بدون اي استخدام أو رؤية واضحة، ودا بيحصل لعدة أسباب:

1- مالك العقار مسافر ومش متواجد فمكان العقار أساسا وان شاء الله لما ينزل من السفر هيبقى يستقر فالعقار ممكن بعد 3 أو 4 سنين او٢٠ سنة (طبعا بتكون الدنيا اتغيرت وممكن يتفاجأ بمكان مختلف عن احلامه وتوقعاته) ويفضل يشطب فيها بالتصوير البطئ (سوء استغلال لعقار بيكون قيمته ملايين وعدم وجود هدف واضح)

2- مالك العقار دفع مقدمة للعقار "بالعافية" قدر يجمعها من مدخراته أو الديون والسلف ويادوب بيلاحق على الاقساط وطبعا فكرة التشطيب بالنسباله فكرة خيالية التفكير فيها ممكن يسبب الضغط والسكر! (مشكلة مزمنة عند قطاع كبير بيسموها الثراء العقاري والفقر المادي)

3- مالك العقار عنده متلازمة التسويف اللانهائية ويفضل يأجل في قرار استغلال العقار سواء بالسكن فيه أو بتأجيره لحد ما يعلقوا على باب العقار "فيلا المرحوم بأذن الله فلان الفلاني "!!

4- مالك العقار معندوش رؤية عن أي حاجة هو اشترى عقار في ظروف معينة بقوة دفع الثقافة المجتمعية والعادات والتقاليد وبقى من اصحاب الاملاك والاصول لكن حرفيا العقار مغلق لحين وضوح الرؤية الغير موجودة أصلا!!

الأسباب اللي ذكرناها وأكيد في غيرها كتير غالبا بترجع لسبب أساسي وهو "عدم وضوح الهدف من شراء العقار" مهما أختلفت الظروف والمبررات أو الاسباب. السؤال المهم أيه هي أهم أهداف شراء العقارات؟؟

شراء أي عقار ليه هدفين:

الاستخدام (سكني أو تجاري أو مقرعمل ليك) والاستخدام ليه اتجاهين

استخدام "حالي" - ليك ولأسرتك أو عملك

استخدام "مستقبلي" - لأولادك مثلا

الاستثمار ودا ليه أكتر من أتجاه

"استثمار طويل الأجل" - هتشتري عقار وتحافظ عليه لمدة طويلة نسبيا أقل مدة مقترحة بتكون 5 سنوات

ويشمل - الاستثمار بهدف تنمية وزيادة رأس المال - هتشتري عقار في منطقة فيها عوامل بتساعد على ارتفاع اسعار العقارات

  • والاستثمار بهدف الحصول على سيولة نقدية دورية - هتشتري عقار في منطقة عليها حركة ايجارات مرتفعة وسهولة نسبية في ايجاد المؤجرين.

"استثمار " - هتشتري عقار وتحاول تضيف ليه قيمة معينة تزود من سعره وتبيعه بعدها.

كل هدف واتجاه من الاهداف والاتجاهات اللي ذكرناها ليها معايير مختلفة تماما عن معايير وعوامل اختيار العقار في باقي الاتجاهات، عشان كدا مهم جدا أنك تعرف هدفك من شرا العقار وتحدده بشكل واضح عشان متخدش قرار تكلفته هتكون عالية عليك ماديا ونفسيا ووقت وجهد